यादां - 2
सादे, सुथरे, सुच्चे घर/
सुझदे थे निक्के/
पर रैह्णे तांईं /
घट नीं थे बझोंदे/
उआन, ओबरी/
घुमदियां गौह्दियां पैडियां/
बोह्ड़, तल्लड़/
संझा-भ्यागा /
चौभुये ते/
सुझदी थी अम्मा/
गोळुये ने लिह्प्पियो/
चुहली बक्खैं बैठी/
सुथरे चौके अंदर/
कनाळे च आटा गुहन्दी/
लकड़ुआं नडेरदी/
कुंदळे च/
भूंपळे ने फूकां मारदी/
इक्की पचौलैं हंडुयें रिझदे/
रेह्डुये डोईया ने छेड़दी/
दूजे पचोलैं दुधुनुये पर/
नज़र रखी/
तोये ते तुआरी/
छलियां दियां रोटियां/
चूल्हैं सेकदी/
गरोखड़ी पर/
तरांबे दा तरमाहडा/
कांसे दा उहारू, कटोरू, ग्लास/
लोहे दी कढ़ाई/
कलई कित्तेह्यो/
पितळी दे पतीलू, बाटू, थाळू, लौटकु,ग्लास/ चिक्का दे हंडू, मल्ली, कुंडू, पारू,/ धियाळू, छनाह्ड़ियां/
सलीके कन्नैं सज्जेह्यो/
रैंह्दे थे ताकां/
होंदे नीं थे तदी/
प्लास्टिक, एल्मुनियम/
कनैं स्टीला दे बर्तण-भांडे/
तल्लड़ी गोंह्णे जो/
बैंह्जे दा बणेह्या मांजळू/
बौह्ड़ी ओबरिया/
बिलंगा पर /
सलीके नैं सज्जेह्यो/
अम्मा, दादिया कनैं पड़दादिया/
दियां सीतिह्यां खिंदां कनैं/
भेडां दिया उन्ना कत्ती/
बुणेह्यो गर्म पट्टू/
ओबरिया कंधा नैं खड़ोह्तेयो/
बैंझे दे डंडे दा इक सिरा/
छत्ती दिया कड़िया कन्नैं बन्नेह्यां/
कनैं दूजा थल्लैं गड्डोह्या/
मधाणिया दियां रस्सियां जो था थमदा/
अम्मा छळैंह्नीं दहीं छोळदी/
जिंञा जिम च /
बांहीं दी कसरत करदा होये कोई/
घुमदिया मधाणिया दी छेड़/
जणता कोई छरूह्डू /
बगदा होये नेडैं-तेडैं/
बंद होंदेयां ही /
साह्म्णे कित्तेह्यो /
निक्के हत्थडुये दिया /
थिहाळिया च/
अम्मा रखी दिंदी थी/
नरम-नरम चिट्टा फाहा/
© भगत राम मंडोत्रा
खूबसूरत रचना.... हार्दिक बधाइयां
जवाब देंहटाएंगोपाल जी, दिले ते धनवाद तुसां दा।
जवाब देंहटाएं