रविवार, 28 अप्रैल 2024

यादां - 1

यादां - 1


मेरे बचपणे च मेरा ग्रां बसदा था/

अनारे देयां दाणेयां सांहीं जुडेह्यो लोक/

चिक्का दियां कंधां अंदर/

कुत्थी सैळां हेठ तां कुत्थी/

कक्खां दिया छांउआं/

जी लैंदे थे बड़े मजे नैं/


नाळू-कुआळू, गौहर, बांयीं-पढैंह्द/ 

चलदे रैंहदे थे/

समे दिया तर्जा पर/

याद नीं ओंदा/

सलीके नैं चिणेह्यो चणाटां/

दे चितरे-बितरे पथरां च/

कदी धूड़ जां काई जम्मी होये/


ग्रां ते खेतरां पासैं/

जांदेयां जो/

टेढ़ी-मेढ़ी संगडियां बत्तां दा/

पतला होणा बझोंदा ही नीं था/

भायें कोई/

तगडेयां बालदां दिया जोड़िया पिच्छें/ 

मूंढे पर हळ, जुंगळा/

हत्थें परैंण लई जांदा होये/

जां सिरे पर बीयां दा टोकरू,/

भटाण लई तुरदी मुटियार कोई/


जिंञा दादू-दादिया/

चाचे-चाचियां,/

भाऊ-बैहणां/

भतीजे-भतीजियां बगैर/

इक्क टब्बर पूरा नीं बणदा था/

तिंञा हर घरे कन्नै/

इक्क घराळ जरूर होंदी थी/

कुत्थी नेडैं तां/ 

कुत्थी जरा प्रहां/

अपणिया-अपणिया ठाहरी/

बन्हेयो रैंहदे थे/ 

घट ते घट/ 

इक्क मैंह्यें, दो बाळद/

इक्क गा/

इक्क-दो भेड़ बकरियां/


असां दे खेलणु होंदे थे/

गांयीं, भेड़-बकरियां दे/

निक्के-निक्के प्यारे/

छालीं मारदे बच्चे/

घराला खुरां हेठ/

दबोई नीं जाण/

इस करी/

ढक्की रखदे थे तिन्हां/

राती जो उआनैं/

बैंह्जे दियां चपतियां दी बुणिह्यो/

डल्ला  हेठ/


© भगत राम मंडोत्रा








पर कोई टिप्पणी नहीं:
सदस्यता लें संदेश (Atom)

यादां - 3

यादां - 3 ग्रांयें दे बिच्चोंबिच्च बगदे/ बरसाती नाळे बक्खी/ हरेक गरोडुये (मोहल्ले) ते उतरदे/ कुआळुआं जो लोही करी/ सिरे पर घड़ा रक्खी/ थल्लैं ...

  • भरो/परहो (प्याऊ)
      भरो/परहो (प्याऊ) मुसाफराँ दी प्यास बुझाँदे थे भरो। सफराँ जो खास बणांदे थे भरो। ठिकाणे तिकर पौंह्चणे ताँईं, दिलाँ च इक आस जगाँदे थे भरो। कु...
  • पत्तन/पत्तण
      पत्तन/पत्तण दरियाँ जो पार कराँदे पत्तन। कंह्डेयाँ जो थे मिलाँदे पत्तन। जित्थू तरियाँ किस्तियाँ बेड़ियाँ, सैह्यो कदिया ते कहाँदे पत्तन। साँ...
  • बत्ताँ (पगडंडियाँ)
      बत्ताँ  (पगडंडियाँ) ताणेयाँ-बाणेयाँ तणदियाँ बत्ताँ। इंञा  ही नीं थियाँ बणदियाँ बत्ताँ। अपणे-निपणे कन्नै जुडने दियाँ, जरूरत्ताँ ही थियाँ जण...