पत्तन/पत्तण
दरियाँ जो पार कराँदे पत्तन।
कंह्डेयाँ जो थे मिलाँदे पत्तन।
जित्थू तरियाँ किस्तियाँ बेड़ियाँ,
सैह्यो कदिया ते कहाँदे पत्तन।
साँढा, हारसी, चम्बा पत्तन,
होंदे थे बख-बख नाँ दे पत्तन।
इन्हाँ राहीं था मिलणा-जुलणा,
हुण गीताँ च गाये जाँदे पत्तन।
भ्यागा ते संझा तिकर चलदे थे।
आर कदी पार घुमाँदे पत्तन।
अम्मा समझाँदी थी पैसे दी कदर,
नीं ताँ पार नीं होयी पाँदे पत्तन।
इक कश्ती कुत्थी कन्नै बेड़ी भी,
मल्लाहाँ दे चप्पू टपाँदे पत्तन।
जीण सौखा बणांदे थे लोकाँ दा,
रुजगार गरीबां जो दुआँदे पत्तन।
देश दी तरक्की होयी, पुल बणे हुण,
पराणे जमाने दे कहाँदे पत्तन।
© भगत राम मंडोत्रा
कोई टिप्पणी नहीं:
एक टिप्पणी भेजें